«Առավոտ» օրաթերթը գրում է.

«Վելես» իրավապաշտպան կազմակերպության նախագահ Մարինա Պողոսյանը երեկ «Առավոտին» ասաց, որ Հայաստանի քաղավիացիայի վարչության նախկին պետ Հովհաննես Երիցյանի գործով դատախազությունն աննախադեպ որոշում է կայացրել: Զինաիդա Մելիքյանը հանդես էր եկել հաղորդմամբ, դիմել էր թե ԱԱԾ, թե գլխավոր դատախազություն, որով պահանջել էր քրեական գործ հարուցել: Զինաիդան հայտնել էր, որ Հովհաննես Երիցյանը սպառնացել է իրեն, պայուսակից մի անգամ էլ հանել ատրճանակը, եւ ասել՝ «Ես գեներալ եմ, կգյուլեմ քեզ, ինձ ոչ մեկը ոչ մի բան չի կարող ասի»:

Զինաիդա Մելիքյանը դիմել էր Կենտրոն եւ Նորք-Մարաշ վարչական շրջանների ընդհանուր իրավասության դատարան, բողոքարկելով դատախազության անգործությունը, քանի որ դատախազությունը կարճել էր գործ հարուցել: Դատավոր Ա. Բեկթաշյանը որոշում էր կայացրել Զինաիդա Մելիքյանի բողոքը բավարարել: Գլխավոր դատախազությունը քրեական գործ է հարուցում «կյանքի սպառնալիքի» հատկանիշներով: «Այդ մարդը՝ Հովհաննես Երիցյանը, փաստորեն, իր ձեռագիրը չէր փոխել»,- ասում է իրավապաշտպան կառույցի ղեկավարը:

«Այդ ընթացքում Դավիթ Ստեփանյանը դիմում է Խաբարովսկից մեզ, հայտնելով, որ Երիցյանի սպառնալիքից փախել է Հայաստանից, ժամանակին աշխատել է Երիցյանի հետ, տարադրամի փոխանակման կետեր է ունեցել, գրավատուն, իսկ Երիցյանն էլ իրեն տոկոսով 900 հազար դոլար գումար է տվել»,- ասում է Մ.Պողոսյանը:

Դ. Ստեփանյանը 10 տարի շարունակ 18 հազար դոլար գումար է տալիս, որպես տոկոս: Գրավադնում է հետագայում իր ընկերների, մտերիմների գույքը, սակայն Երիցյանը պահանջում է 400 000 դոլար գումար մնացորդը: Մարդն ընկնում է հոգեբուժարան: Կա ձայնագրություն, որով հաստատվում է, որ տվյալ անձը 1 միլիոն 900 000 դոլար գումար վերադարձրել է: Իսկ սպառնալիքին միջամտում է հայաստանաբնակ մի մականունավոր, ասելով՝ «արյուն է թափվելու»:

«Երբ տոկոսով տրված գումարները գումարում ես, դառնում է մեծ թիվ, իսկ դատախազությունը թեւերը փռել է Երիցյանի վրա: Երբ հիմա ասում են, թե գումար չկա զենք, զինամթերք գնելու համար, կոռուպցիայի դեմ են պայքարում, բա մենք 2 տարի է՝ Երիցյանի արածների դեմ պայքարում ենք, մեկը չի՞ հարցնում՝ Երիցյան ջան, 900 հազար դոլարը, որ դու տվել ես, որտեղի՞ց, քաղավիացիայի՞ց, ինչպե՞ս, երբ դու ընդամենը երկու տարի ես աշխատել պետի պաշտոնում»,-հարցնում է Մ. Պողոսյանը: Կան ձայնագրություններ, որոնցից մեկում պաշտոնատար անձն ասել է, թե՝ «գումարն իրենը չի, մի մասը կագեբեի գեներալի փող է»:

Մարինա Պողոսյանն ասում է, որ իրենք պատրաստեցին «հաղորդում հանցագործության մասին» եւ դիմեցին գլխավոր դատախազություն: Ներկայացվել են ձայնագրություններ, որտեղ քաղավիացիայի նախկին պետը սպառնացել է Դ. Ստեփանյանին: «Ասացինք, լավ, վաշխառությունը չեք հաստատում, պաշտպանում եք, բայց՝ կյանքի սպառնալիքն ակնհայտ է: Մենք մի հատ գրասենյակ ենք վարձում, 40 դոլար ամսեկան պետությանը հարկ ենք մուծում: Իսկ այսքան միլիոններից ինչո՞ւ ոչ մի լումա չի մուծվել»,- հարցնում է իրավապաշտպանը: Դավիթ Ստեփանյանի ընտանիքի նկատմամբ կյանքի սպառնալիքի հոդվածի հատկանիշներով քրեական գործ է հարուցվել: Կենտրոնի քննչականը կիրականացնի նախաքննությունը:

Մարինա Պողոսյանը վաշխառության գործը նույնացնում է «Ֆինանսական բուրգի» գործի հետ: Ի դեպ, իրենց տուժող համարող ընտանիքները թե դատական գործընթացների ժամանակ, թե «Առավոտի» հետ զրույցներում նշել են, որ Հովհ. Երիցյանն անընդհատ իրենց վախեցրել է զենքով: Մարինա Պողոսյանն էլ դատական նիստերից մեկի ժամանակ հայտարարել էր, թե իր հետ քննիչի մոտ առերեսման եկած Երիցյանը եղել էր զենքով:

Ռ. Մ. «Առավոտ» 09.06.2016

http://www.aravot.am/?s=%C2%AB%D5%8A%D5%A1%D5%B5%D5%B8%D6%82%D5%BD%D5%A1%D5%AF%D5%AB%D6%81+%D5%A1%D5%B6%D5%A3%D5%A1%D5%B4+%D5%B0%D5%A1%D5%B6%D5%A5%D5%AC+%D5%A7%D6%80+%D5%A1%D5%BF%D6%80%D5%B3%D5%A1%D5%B6%D5%A1%D5%AF%D5%A8+%D5%A5%D6%82+%D5%A1%D5%BD%D5%A5%D5%AC%D5%9D+%D5%A3%D5%A5%D5%B6%D5%A5%D6%80%D5%A1%D5%AC+%D5%A5%D5%B4%2C+%D5%AF%D5%A3%D5%B5%D5%B8%D6%82%D5%AC%D5%AC%D5%A5%D5%B4%C2%BB

Վաշխառության զոհ դարձած Գայանե Թումասյանը հանցագործության մասին հաղորդում էր ներկայացնել՝ պնդելով, որ ինքը կորցրել է իրեն պատկանող անշարժ՝ ՀՀ Քաղաքացիական ավիացիայի վարչության նախկին պետ Հովհաննես Երիցյանի կատարած խարդախության արդյունքում: Դատախազ Վահե Դոլմազյանը, հաղորդումը ստանալուց 65 օր անց Թումասյանին պատասխան է ուղարկել՝ նշելով, որ նրա ներկայացրած փաստերը քաղաքացիաիրավական հարաբերություններում են գտնվում:

Գայանե Թումասյանն այժմ դատարանում բողոքարկում է  դատախազության անգործությունը, քանի որ ՀՀ օրենսդրությունը սահմանում է, որ հանցագործության մասին հաղորդում ստանալուց հետո դատախազությունը պարտավոր է որոշում կայացնել ստացված հաղորդման մասին: Որոշում սակայն չի կայացվել, փոխարենը Թումասյանը ստացել է նամակ՝ դատախազ Վահե Դոլմազյանից:

Վերջինս Կենտրոն եւ Նորք-Մարաշ վարչական շրջանների դատարանում կրկին պնդեց, որ Գայանե Թումասյանի տված հաղորդման մեջ հանցագործության մասին փաստեր չեն եղել: «Դուք գրբաց չեք, որ առանց գործը քննելու իմանաք՝ սա քաղաքացիաիրավական հարաբերության խնդիր է, թե քրեական: Ձեր կարծիքը Գայանե Թումասյանի տված հաղորդման մասին որեւէ մեկի չի հետաքրքում»,- դատախազին հակադարձեց դատարանում Թումասյանի շահերը ներկայացնող «Վելես» իրավապաշտպան կազմակերպության նախագահ Մարինա Պողոսյանը:

Վերջինս նշեց, որ իրենց համար զարմանալի չէ, որ դատախազությունը Հովհաննես Երիցյանի պաշտպանությունն է ստանձնել, սակայն հանցագործության մասին հաղորդման վերաբերյալ, ըստ օրենքի, դատախազությունը պարտավոր է որոշում կայացնել: «Դուք կատարեք օրենքի պահանջը՝ կայացրեք որոշում, ոչ թե մասնավոր կարծիք արտահայտեք: Եթե մենք չհամաձայնենք Ձեր կայացրած որոշման հետ, այն կբողոքարկենք»,- նշեց իրավապաշտպանը:

Հիշեցնենք, որ Գայանե Թումասյանը պնդում է, որ նախկին պաշտոնյան վաշխառությամբ է զբաղվում՝ տոկոսով գումար է պարտքով տալիս եւ մարդկանց խաբեության միջոցով զրկում է տնից: Երիցյանի դեմ նմանատիպ հաղորդումներ են ներկայացրել եւս երկու անձինք: Նախկին պաշտոնյային, սակայն, մինչ օրս մեղադրանք չի առաջադրվել:

Գայանե Թումասյանի բողոքի քննությունը կշարունակվի հունիսի 10-ին, առավոտյան 10:30-ին:

ԱՐՇԱԿ ԴԱՎԹՅԱՆ

Հարգելի քաղաքացիներ, «Վելես» իրավապաշտպան կազմակերպությունը դիմումներ է ստացել 5 անձանցից, որոնք պնդում են, որ փաստաբան Մկրտիչ Դավթյանը չի կատարել իրենց պայմանագրերով նախատեսված պարտավորությունները եւ բազմաթիվ խնդիրներ է ստեղծել իրենց համար:

Մեր տեղեկություններով, փաստաբանի գործունեությունից տուժած անձանց թիվը շատ ավելին է: Բոլոր նրանք, ովքեր իրավական խնդիրների առջեւ են կանգնել Մկրտիչ Դավթյանի գործունեության արդյունքում, կարող են դիմել մեզ զանգահարելով 08000-13-13 հեռախոսահամարին:

Դատախազությունը «ջրում է» Երիցյանի դեմ բերված ցանկացած բողոք. www.1in.am

Քաղաքացիական ավիացիայի նախկին պետ Հովհաննես Երիցյանը հզոր հովանավորներ ունի ՀՀ Գլխավոր դատախազությունում. այս մասին դեռ անցած տարի բաց նամակով հայտարարել էր «Վելես» հասարակական կազմակերպությունը: Դատախազությունը հավատարիմ է մնում իր գործելաոճին և մինչ օրս «ջրում է» Երիցյանի դեմ ներկայացրած ցանկացած բողոք և հանցագործության մասին հաղորդում:

Արդեն երրորդ ընտանիքն է Երիցյանի դեմ հաղորդում ներկայացրել՝ պնդելով, որ նա վաշխառությամբ տիրացել է իրենց ունեցվածքին: Դատախազությունը, այնուամենայնիվ, մնում է նույն կարծիքին՝ Երիցյանը կասկածից վեր է: Համառոտ ներկայացնենք նախկին պաշտոնյայից տուժած երեք ընտանիքների պատմությունները:

Գործ N1

Զինաիդա Մելիքյանի ընտանիքը փողոցում է հայտնվել դեռևս 2014 թվականին: Զինաիդայի խոսքով՝ ինքը 100.000 ԱՄՆ դոլար է տոկոսով վերցրել Հովհաննես Երիցյանից, որը խաբեությամբ իրեն ստիպել է բնակարանը «վաճառել»՝ որպես գումարը վերադարձնելու երաշխիք: Առքուվաճառքը շինծու է եղել, Զինաիդային խոստացել են, որ երբ պարտքն ամբողջությամբ մարի, բնակարանը կվերադարձնեն իրեն: Արդյունքում ընտանիքը հայտնվել է փողոցում:

Զինաիդան հաղորդում էր ներկայացրել հանցագործության մասին՝ ներկայացնելով նաև ձայնագրությունը, որում լսվում է, թե Հովհաննես Երիցյանն ինչպես է սպառնում իրեն:

Զինաիդայի խոսքով՝ Երիցյանն իրեն սպառնացել է ոչ միայն հեռախոսազրույցի ժամանակ, այլև դեմ առ դեմ հանդիպումների ընթացքում: «Մի անգամ վեճի բռնվեցի հետը, պայուսակից հանեց ատրճանակը ու ասաց՝ ես գեներալ եմ, կգյուլեմ քեզ, ինձ ոչ մեկ ոչ մի բան չի կարա ասի»,- հիշում է Զինաիդան:

Զինաիդա Մելիքյանի հաղորդման հիման վրա քրեական գործ էր հարուցվել: Գործի վարույթը, սակայն, կարճվել էր, և Երիցյանին մեղադրանք չէր առաջադրվել: Կարճման որոշման դեմ բողոք է ներկայացվել Երևան քաղաքի դատախազին: Վերջինս ներկայացված բողոքի վերաբերյալ որևէ որոշում չի կայացրել, ինչը պարտավոր էր անել՝ համաձայն ՀՀ օրենսդրության:

Զինաիդա Մելիքյանը Կենտրոն և Նորք-Մարաշ ընդհանուր իրավասության դատարանում բողոքարկել է դատախազության անգործությունը: Դատավոր Ա. Բեկթաշյանը որոշում է ընդունել՝ դատախազությանը պարտավորեցնել Զինաիդա Մելիքյանի բողոքի հիման վրա որոշում կայացնելու մասին: Ներկայումս Զինաիդան սպասում է դատախազության որոշմանը:

Գործ N2

Գայանե Թումասյանը հեռացել է Հայաստանից՝ կորցնելով իր միակ կացարանը: Նրա ամուսինը կալանավորված է, միակ տղան մահացել է 19 տարեկանում: Որդեկորույս մայրը դեռ փորձում է վերադարձնել իր տունը, որտեղ ներկայումս բնակվում է Հովհաննես Երիցյանը:

Գայանե Թումասյանի ամուսինը` Լուսաբեկ Սամվելյանը, դատարանում ցուցմունք է տվել, որ ինքը տարիներ շարունակ տոկոսով գումար է վերցրել Հովհաննես Երիցյանից:

Թումասյանի խոսքով՝ իր ամուսինն ու Երիցյանը սեփականության առքուվաճառքի կեղծ պայմանագիր են կնքել՝ պայմանով, որ երբ Լուսաբեկը վերադարձնի գումարը, տունը դարձյալ հետ կվաճառեն իրեն:

Առքուվաճառքի պայմանագիրը կնքելիս կողմերը կեղծիք են կատարել, որը հետագայում բացահայտվել է Վերաքննիչ դատարանում: Գայանե Թումասյանը, ում պատկանում էր տան ½-ը, տեղյակ չի եղել ամուսնու և Երիցյանի գործարքներից: Երիցյանի սանիկը` Վահե Վարդանյանը, նոտարում կեղծ հայտարարություն է տվել այն մասին, թե Լուսաբեկ Սամվելյանը ամուսնացած չէ, այնինչ վերջինիս պնդմամբ` թե՛ Վահեն, թե՛ Երիցյանը հիանալի տեղյակ են եղել իր ամուսնական կարգավիճակի մասին: Արդյունքում Գայանե Թումասյանը, որը որևէ գործարքի չի մասնակցել, զրկվել է իր սեփականությունից՝ հայտնվելով փողոցում:

Գայանե Թումասյանը ևս հաղորդում է ներկայացրել հանցագործության մասին, սակայն նրա հաղորդման վերաբերյալ ևս դատախազությունը որոշում չի կայացրել (ինչը դատարանը պարտավորեցրել է նաել Զ.Մելիքյանի գործով): Թումասյանը ներկայումս դատախազության անգործությունը բողոքարկում է Կենտրոն և Նորք-Մարաշ վարչական շրջանների ընդհանուր իրավասության դատարանում: Բողոքի քննությունը նշանակված է հունիսի 6-ին:

Գործ N3

«Առաջին լրատվական»-ը վերջերս ներկայացրել էր Դավիթ Ստեփանյանի և Հովհաննես Երիցյանի գործարքների մանրամասները: Այս գործում ևս առկա էձայնագրություն, որում լսվում են նախկին պաշտոնյայի սպառնալիքները: Ստեփանյանը ևս ընտանիքով հեռացել է Հայաստանից՝ կորցնելով իրենց պատկանող անշարժ գույքը:

Դավիթ Ստեփանյանը հաղորդում էր ներկայացրել հանցագործության մասին, որի հիման վրա ՀՀ ոստիկանության Կենտրոնական բաժնի Մարաշի բաժանմունքում նյութեր են նախապատրաստվել: Մայիսի 6-ին որոշում է կայացվել քրեական գործ հարուցելը մերժելու մասին: Օրեր առաջ Ստեփանյանը դատախազություն բողոք է ներկայացրել քրեական գործ հարուցելը մերժելու որոշման դեմ:

Հաշվի առնելով Երիցյանի նկատմամբ դատախազության ցուցաբերած վերաբերմունքը՝ կարելի է ենթադրել, որ այս բողոքը ևս «կջրվի» դատախազության կողմից:

Վաշխառության և կոռուպցիայի դեմ պայքարող «Վելես» հասարակական կազմակերպության նախագահ Մարինա Պողոսյանը «Առաջին լրատվական»-ի հետ զրույցում նշեց, որ կոռուպցիայի դեմ «պայքարող» կառավարությունը պետք է որ հետաքրքրվեր, թե որտեղից նախկին պաշտոնյային հսկայական գումարներ:

«Երբ հանրագումարի ենք բերում երեք ընտանիքների ներկայացված գումարները, ստացվում է, որ տվյալ անձը միլիոնավոր դոլարներ ունի, սակայն որևէ գործով որևէ հետաքննիչ Երիցյանին երբեք չի հարցրել, թե ի՞նչ ճանապարհով է գոյացել նրա հարստությունը»,- նշում է փաստաբանը:

Մարինա Պողոսյանի կարծիքով՝ ՀՀ կառավարությունը չի պայքարել կոռուպցիայի դեմ, քանի դեռ ներկա և նախկին կոռումպացված պաշտոնյաները մնում են անպատիժ:

Ամիսներ առաջ «Վելես» իրավապաշտպան հասարակական կազմակերպությունը դիմել էր ՀՀ քննչական կոմիտե՝ ահազանգելով, որ թիվ 14149815 քրեական գործով քննիչ Անդրանիկ Վարդանյանը ապօրինի որոշում է կայացրել եւ  արգելանք է դրել գործով որպես վկա անցնող Ա. Հ.-ին պատկանող անշարժ գույքի վրա: Քրեական գործի վարույթը շարունակել է Արաբկիրի քննչական բաժնի ավագ քննիչ Լ. Յոլչյանը, ով արգելանքի որոշումը չի վերացրել, ինչի պատճառով էլ ենթարկվել է «խիստ նկատողություն» կարգապահական տույժի:

«Վելես» ՀԿ-ին ուղղված գրությունում ՀՀ քննչական կոմիտեի ներքին անվտանգության վարչության պետ Գ.Լ. Նավասարդյանը հայտնում է, որ մեր դիմումների հիման վրա կատարվել է ծառայողական քննություն եւ բացահայտվել է, որ ավագ քննիչ Լ. Յոլչյանը թույլ է տվել քրեադատավորական օրենքի կոպիտ խախտում:

Նշենք, որ «Վելես» ՀԿ-ն մեկ այլ դիմում էլ է ուղարկել ՀՀ քննչական կոմիտե՝ պահանջելով տույժի ենթարկել նաեւ քննիչ Անդրանիկ Վարդանյանին, ով կայացրել էր ապօրինի որոշում՝ արգելանք դնելու մասին:

«Առաջին լրատվական»-ը շարունակում է հետաքննել Քաղաքացիական ավիացիայի նախկին պետ Հովհաննես Երիցյանի ներգրավվածությամբ կատարված գործարքների «մութ էջերը»: Վերջինս անցել և անցնում է մի քանի քրեական գործերով, որի շրջանակներում քաղաքացիները նախկին պաշտոնյային մեղադրում են վաշխառության և խարդախության, ինչպես նաև կյանքին և առողջությանը սպառնալիքներ ներկայացնելու մեջ: Քննիչները, սակայն, Երիցյանին մինչ օրս մեղադրանք չեն ներկայացրել, թեև նրա դեմ ցուցմունքներ են տվել նույնիսկ իր հարազատները:

Օրերս մեզ հաջողվեց կապ հաստատել Ռուսաստանի Խաբարովսկ քաղաք տեղափոխված ընտանիքի հետ, որը ստիպված է եղել վաճառել Հայաստանում ունեցած ամեն ինչ՝ պարտքով վերցրած գումարի տոկոսները վճարելու համար: Դավիթ Ստեփանյանը Հովհաննես Երիցյանի հետ ծանոթացել է դեռևւս 2001 թվականին, երբ նա ղեկավարում էր ՀՀ Քաղաքացիական ավիացիան: Ստեփանյանը մեզ պատմեց, որ արտարժույթի փոխանակման կետեր է ունեցել Երևանում և բիզնեսում ներդրում անելու նպատակով պարտքով գումար է խնդրել Հովհաննես Երիցյանից: «Վերցրել եմ 150.000 ԱՄՆ դոլար՝ ամսական 2%-ով: Հետո էլի եմ վերցրել, կամաց-կամաց պարտքը դարձավ 900.000 ԱՄՆ դոլար: Ես 10 տարվա մեջ 2 միլիոն դոլարից ավելի տոկոս եմ փակել»,- վստահեցնում է Ստեփանյանը:

Այս տարիների ընթացքում Ստեփանյանը զրկվում է թե՛ ընտանեկան բիզնեսից, թե՛ իրեն և մորը պատկանող բնակարաններից: «Ես տներ գրավ դրեցի, 500.000 ԱՄՆ դոլար վճարեցի, բայց ստացական չվերցրեցի իրենից, մենք ընտանիքներով մտերիմ էինք: Բայց հիմա Երիցյանն ասում է, թե պիտի 900.000-ը վճարես»,- պատմում է Դավիթ Ստեփանյանը:

2015 թվականին Հովհաննես Երիցյանը դիմել է Կենտրոն և Նորք-Մարաշ վարչական շրջանների ընդհանուր իրավասության դատարան՝ Դավիթ Ստեփանյանից և նրա կնոջից գումար բռնագանձելու պահանջով: Նախկին պաշտոնյան դատարանին հայտնել է, որ 2010 թվականին պատասխանողներին փոխառությամբ տվել է 360 միլիոն ՀՀ դրամ գումար, որը վերջիններս պարտավորվել են վերադարձնել մինչև 11.09.2013թ.… Կնքել է փոխառության պայմանագիր, որը նոտարական վավերացում է ստացել:

«Այդ 360 միլիոնը այն ժամանակվա կուրսով հենց 900.000 ԱՄՆ դոլար էր անում: Ես նոտարով պարտավորվել էի, որ պետք է վճարեմ այդքան»,- ասում է Դավիթ Ստեփանյանը:

Դատարանը որոշել է` Դավիթ Ստեփանյանից և Գայանե Աբգարյանից համապարտության կարգով հօգուտ հայցվոր Հովհաննես երիցյանի բռնագանձել 250.000.000 (երկու հարյուր հիսուն միլիոն) ՀՀ դրամ…
Ստեփանյանի խոսքով՝ 5 տարի առաջ իր մոտ ծանր դեպրեսիա է սկսվել, որից մինչ օրս չի կարողանում ազատվել: Նախկին բիզնեսմենը հավատացնում է, որ Հովհաննես Երիցյանը տարիներ շարունակ իրեն սպառնում և ահաբեկում է:

Ստեփանյանին հաջողվել է ձայնագրել իր և Հովհաննես Երիցյանի միջև տեղի ունեցած խոսակցություններից մի քանիսը, որտեղ լսվում է, թե նախկին պաշտոնյան ինչպես է պահանջում վերադարձնել գումարը:

Դավիթ Ստեփանյանի խոսքով՝ Հովհաննես Երիցյանը իրեն վստահեցրել է, որ իրեն տոկոսով տված գումարի մի մասը ФСБ գեներալի փողն է, ով իբր ստիպում է վերադարձնել գումարը: «Ասում էր, էդ փողը, պիտի տաս, թե չէ արյուն ա լինելու»,- պատմում է Ստեփանյանը: Այս խոսակցության ձայնագրությունը ևս Ստեփանյանը տրամադրել է «Առաջին լրատվական»-ին»:

Դավիթ Ստեփանյանը դիմել է ՀՀ գլխավոր դատախազություն՝ հայտնելով, որ Երիցյանը սպառնում է իրեն: Ներկայումս ոստիկանության Կենտրոնի բաժնում նյութեր են նախապատրաստվում Ստեփանյանի դիմումի հիման վրա:

Հիշեցնենք, որ ՀՀ քաղաքացիական ավիացիայի նախկին պետ Հովհաննես Երիցյանի՝ վաշխառությամբ զբաղվելու մասին մի քանի ընտանիքներ դեռևս 2014 թվականին բաց նամակով դիմել էին ՀՀ նախագահին: Վաշխառության փաստով նախկինում հարուցվել են քրեական գործեր, սակայն Երիցյանին որևէ մեղադրանք այդպես էլ չի առաջադրվել:

Վաշխառության զոհ դարձած ընտանիքների իրավունքները պաշտպանող «Վելես» հասարակական կազմակերպության նախագահ Մարինա Պողոսյանը մեզ հետ զրույցում նշեց, որ իր տպավորությամբ Հովհաննես Երիցյանը հովանավորվում է իշխանության ամենաբարձր օղակներից. «Ես պարզապես չեմ կարողանում պատկերացնել, թե այսքան աղաղակող փաստերից հետո նրան ինչպես է հաջողվում անպատիժ մնալ: Առնվազն երեք ընտանիք միայն մեր կազմակերպությանն է դիմել, որոնք իրենց տներն են կորցրել: Պատկերացրեք, որ այդ ընտանիքների թիվը շատ ավելի կարող է լինել: Հասկանալի է, որ այստեղ կամ մեծ կաշառքների մասին է խոսքը, կամ իշխանության հովանավորչության»:

Մարինա Պողոսյանը զարմանում է, թե ինչու Ազգային անվտանգության ծառայությունը չի հետաքրքրվում նախկին պաշտոնյայի եկամուտների ծագման աղբյուրով: «Պարզապես անհնար է արդար աշխատանքով վաստակել այն գումարները, որոնք շրջանառության մեջ է դրել նախկին պաշտոնյան: Սա ևս մեր բանակից թալանված փողերն են, որը պետք է վերադարձնել հասարակությանը»,- կարծում է իրավապաշտպանը:

Նշենք, որ Հովհաննես Երիցյանը մշտապես պնդել է, որ ինքը որևէ մեկի տոկոսով գումար չի տվել, թեև ձայնագրությունները հակառակն են ապացուցում: Նախկին պաշտոնյայի այլ գործարքներին և ֆինանսական աղբյուրներին կանդրադառնանք մեր առաջիկա հոդվածներում:

http://www.1in.am/1905859.html

Հասարակական կազմակերպության նախագահ Մարինա Պ.-ն 2015 թվականի սեպտեմբերի 4-ին հաղորդում է տվել այն մասին, որ 2005-2008թթ. ընթացքում Վիկտոր Ս.-ն, խաբեության եղանակով, շինարարական աշխատանքներ կատարելու պատրվակով իր վստահորդ Ալեքսեյ Կ.-ից մաս-մաս վերցրել է 5 մլն. ԱՄՆ դոլար գումար և հափշտակել այն: Մարինա Պ.-ի հաղորդման հիման վրա՝ ՀՀ քննչական կոմիտեի Կենտրոն և Նորք-Մարաշ վարչական շրջանների քննչական բաժինում ՀՀ քրեական օրենսգրքի 178-րդ հոդվածի 3-րդ մասի 1-ին կետով հարուցվել է գործ և տևական ժամանակ կատարվելնախաքննություն: Հետագայում ՀՀ գլխավոր դատախազը գործի փաստական հանգամանքներով պայմանավորված՝ լրիվ, օբյեկտիվ և բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկել ՀՀ հատուկ քննչական ծառայություն: Նախաքննությունը շարունակվում է:

Ամբողջական հոդվածը կարող եք կարդալ այս հասցեով՝ http://armlur.am/522941/

«Վելես» իրավապաշտպան կազմակերպության նախագահ Մարինա Պողոսյանը Հայաստանի Հանրապետության դեմ գանգատ է ներկայացրել Մարդու Իրավունքների Եվրոպական դատարան: Գանգատը վերաբերում է Դատական ակտերի հարկադիր կատարման ծառայության աշխատակիցների կողմից Մարինա Պողոսյանի նկատմամբ կիրառված ֆիզիկական բռնության գործին, որը քննվել է հայաստանյան դատարաններում, սակայն ԴԱՀԿ ծառայակիցները պատասխանատվության չեն ենթարկել:

Մարինա Պողոսյանը «Առաջին լրատվական»-ին տված հարցազրույցում ԴԱՀԿ ծառայակիցների կողմից կիրառված ոտնձգությունը գնահատել էր որպես սեռական ոտնձգություն իր նկատմամբ: Հիշեցնենք, որ 2014 թվականի մարտի 17-ին Երեւանի Աբովյան փողոցում բնակվող ընտանիքին վտարելու ընթացքում ԴԱՀԿ ծառայակիցները բռնություն էին կիրառել ընտանիքի ամենատարեց անդամի՝ 77-ամյա Զինա Գյոզալյանի նկատմամբ: Դեպքի վայր ժամանած իրավապաշտպան Մարինա Պողոսյանը փորձել էր կանխել բռնությունը, սակայն արդյունքում ինքն էլ էր բռնությունների եւ ստորացումների ենթարկվել:

ԴԱՀԿ ծառայակիցները նախ իրավապաշտպանին զրկել էին ազատությունից՝ սենյակներից մեկի դուռը կողպել էին եւ թույլ չէին տվել, որպեսզի նա դուրս գա այդտեղից: Իսկ քիչ անց բացել էին դուռը եւ գրկած դուրս էին բերել Պողոսյանին տարածքից՝ նետելով բետոնե աստիճանների վրա: Պողոսյանը մարմնական վնասվածք էր ստացել:

«Եթե գործը քննող քննիչի, դատախազի եւ դատավորի համար նորմալ է, որ օտար տղամարդիկ կարող են գրկելով տեղափոխել իրենց կանանց, ապա ես դա դիտում եմ որպես սեռական ոտնձգություն»,- «Առաջին լրատվականին» ասել է Մարինա Պողոսյանը:

Դիմելով Եվրոպական դատարան՝ իրավապաշտպանը նշել է, որ Հայաստանի Հանրապետությունը խախտել է Մարդու Իրավունքների Եվրոպական Կոնվենցիայի 3-րդ, 8-րդ եւ 13-րդ հոդվածները: «Դիմումատուն գտնում է, որ ԴԱՀԿ աշխատակիցների կողմից ուժի գործադրումը, իր վստահորդի աչքի առաջ իրեն ճնշումների ենթարկելն ու նսեմացնելը հանգեցրել է Կոնվենցիայի 3-րդ հոդվածով ամրագրված Խոշտանգումների արգելքի, 8-րդ հոդվածով ամրագրված՝ Անձնական և ընտանեկան կյանքը հարգելու իրավունքի խախտման, իսկ դեպքերի կապակցությամբ արդյունավետ քննության և մեղավորներին պատասխանատվության ենթարկելու բացակայությունը հանգեցրել է Կոնվենցիայի 13-րդ հոդվածի՝ Իրավական պաշտպանության արդյունավետ միջոցի իրավունքի խախտման»,- նշված է գանգատում:

http://www.1in.am/1864471.html

Ռուս գործարարների դիմումների հիման վրա ՀՀ Քննչական կոմիտեի Կենտրոնի բաժնում օտարերկրյա ներդրողներին խարդախության զոհ դարձնելու դեպքերի առիթով հարուցվել է քրեական գործ՝ առանձնապես խոշոր չափերով խարդախություն կատարելու փաստի առթիվ: Տեր-Հովսեփյանը, գործին ներգրավված լինելով վկայի կարգավիճակով, բողոքարկել էր Քննչական կոմիտեի՝ քրեական գործ հարուցելու որոշումը: Մի քանի ամիս տեւած դատաքննության արդյունքում դատարանը (դատավոր Արմեն Բեկթաշյան), մերժեց Տեր-Հովսեփյանի հայցը:

Հիշեցնենք, որ ռուս գործարարների շահերը ներկայացնում է «Վելես» իրավապաշտպան կազմակերպությունը: Կազմակերպության նախագահ Մարինա Պողոսյանը կարծում է, որ Վիկտոր Տեր-Հովսեփյանը հարցը կանխամտածված կերպով տեղափոխել էր դատարան, որպեսզի ժամանակ շահի: «4 ամիս է՝ դատաքննություն է ընթանում, եւ պատեհ-անպատեհ առիթներով իրենք միջնորդում են, որպեսզի երկարաձգվի այս դատապրոցեսը: Սա այն դեպքում, երբ գործով որպես վկա ներգրավված Վիկտոր Տեր-Հովսեփյանի իրավունքները չեն խախտվել, այդ թվում՝ անմեղության կանխավարկածը: Տեր-Հովսեփյանի փաստաբանների հայտարարություններից ստացվում է, որ եթե Հայաստանում մեկը հաղորդում տա ինչ որ մեկի կողմից խարդախության մասին, պետք է բոլորը հարցնեն այդ անձի փաստաբանների կարծիքը՝ նրանք կո՞ղմ են, որ քրեական գործ հարուցվի, թե՞ ոչ: Վաղը կարող են այլ մարդիկ հայտնվել մեղադրյալի աթոռին: Ու եթե մարդը հանգիստ է, գիտի, որ ինքը քրեորեն պատժելի արարք չի կատարել, ապա չպետք է անհանգստանա»,- մեզ հետ զրույցում ասաց Մարինա Պողոսյանը:

Հարցը դատարան տեղափոխելու Տեր-Հովսեփյանի երկրորդ արդյունքը, ըստ իրավապաշտպանի, այն է, որ փաստաբանները դրանով հնարավորություն ունեցան ծանոթանալ քրեական գործի նյութերին եւ մշակել իրենց հետագա մարտավարությունը: Սա, ըստ Մարինա Պողոսյանի, գործը վարող քննիչի բացթողումն է: «Իհարկե, եթե բողոքարկվել է քրեական գործի հարուցումը, գործի նյութերը պետք է ներկայացվեին դատարան: Սակայն քննիչը պարտավոր էր որոշել այն ծավալը, որին փաստաբանները կարող էին ծանոթանալ: Տուժողների ցուցմունքներին ծանոթանալու հնարավորություն քննիչը պարտավոր էր չտալ»,- նշեց Մարինա Պողսյանը:

Հոդվածն ամբողջությամբ սկզբնաղբյուրում

Նախկին ոստիկան, գյումրեցի Թորգոմ Թորոսյանն անզիջում պայքար է մղում իրեն պարտք տված Մելադա Սարգսյանի դեմ, որը փորձում է տիրանալ ԱՄՆ-ի Կարմիր խաչի կողմից նվեր ստացած նրա բնակարանին: Թորգոմը պարտվել է առաջին ատյանի դատարանում, սակայն շարունակում է պայքարը այլ ատյաններում: Արդարադատության նախարար Արփինե Հովհաննիսյանին նա կոչ է անում ուշադրություն դարձնել դատավոր Մեխակ Գևորգյանի «շահադիտական ապօրինությունների վրա»:

Հիշեցնենք, որ Հայաստանում մեծ գումարներ ներդրած ռուս գործարարներ Ալեքսեյ Կորեպանովը, Դմիտրի Աֆոնինը եւ Դմիտրի Կոտովը փորձում են իրավական պատասխանատվության ենթարկել Վիկտոր Տեր-Հովսեփյանին, ով, գործարարների խոսքով, իրենցից յուրացրել է 5 միլիոն դոլարի չափով գումար: Ռուս գործարարների դիմումների հիման վրա ՀՀ Քննչական կոմիտեի Կենտրոնի բաժնում օտարերկրյա ներդրողներին խարդախության զոհ դարձնելու դեպքերի առիթով հարուցվել է քրեական գործ՝ առանձնապես խոշոր չափերով խարդախություն կատարելու փաստի առթիվ (ՀՀ քրեական օրենսգրքի 178 հոդվածի 3-րդ մասի 1-ին կետ): Իսկ Տեր-Հովսեփյանն, առայժմ գործին ներգրավված լինելով վկայի կարգավիճակով, բողոքարկել է դատախազության՝ ռուս գործարարների ցուցմունքների եւ ներկայացրած փաստերի հիմքով քրեական գործ հարուցելու որոշումը:

Իրադարձությունների զարգացմանը մեծ ուշադրությամբ հետեւում է Հայաստանում Ռուսաստանի Դաշնության դեսպանությունը: Դեսպանությունը հետաքրքրված է իր քաղաքացիների շահերի պաշտպանությամբ եւ անգամ նամակով դիմել է ՀՀ իրավապահ մարմիններին՝ պահանջելով ՌԴ քաղաքացիների շահերի լիարժեք պաշտպանություն: Վիկտոր Տեր-Հովսեփյանի շահերի ներկայացուցիչներին՝ 4 հոգիանոց փաստաբանական խմբին, սա առիթ է տվել հայտարարելու, որ ՌԴ իշխանությունները քաղաքական ճնշում են բանեցնում Հայաստանի իրավապահ մարմինների եւ դատական համակարգի, ԱԳՆ-ի եւ, ընդհանրապես, ՀՀ իշխանությունների վրա:

Հոդվածն ամբողջությամբ կարդացեք սկզբնաղյուրում:

Հարգելի տիկնայք եւ պարոնայք,

Սույն հայտարարությամբ ահազանգում ենք ՀՀ Քննչական Կոմիտեի մի շարք աշխատակիցների պաշտոնական լիազորությունների չարաշահումների մասին:  Օրեր առաջ լրացավ «Վելես» հասարակական կազմակերպության գրանցման 2 ամյակը: Այս երկու տարիների ընթացքում  մեր կողմից մոտ  քսան   բողոք դիմումներ, հեռագրեր և  հաղորդումներ են   ներկայացվել  ՀՀ Քննչական կոմիտեի՝ մի շարք քննիչների գործելակերպի   վերաբերյալ, որոնց ի պատասխան ստացել ենք մշտապես ստացել ենք միևնույն, ոչինչ չարտահայտող գրություններ:

Մեր կողմից  ներկայացված դիմումներում և հաղորդումներում նշված  փաստերի համադրությունը անառարկելիորեն վկայում է, որ ՀՀ Սահմանդրությամբ նախատեսված իրենց պարտականություններն իրականցնելու և քաղաքացիների պաշտպանությունը հանցագործություններից և հանցագործներից ապահովելու փոխարեն ՝

• ՀՀ Քննչական կոմիտեն, հանձինս իր աշխատակիցների, բացառիկ հովանավորչություն է դրսևորում ՀՀ նախկին պետական պաշտոնյաների նկատմամբ՝ նրանց անօրինական գործողություններն օրինականցնելու և վերջիններիս  գործողություններից տուժած,  ունեզրկված քաղաքացիների իրավունքների   և  շահերի  ոտնահարման ուղղությամբ

Մասնավորապես խոսքը  վերաբերվում է  ՀՀ քաղաքացիական ավիացիայի նախկին պետ Հովհաննես Երիցյանին, որն ըստ մեր կազմակերպությանը  դիմած մի քանի  ընտանիքների,  տարիներ ի վեր զբաղվում է վաշխառությամբ և բարձր  տոկոսադրույքներով՝ անհայտ ճանապարհով  ձեռք բերված գումարներ տրամադրելով, ինչպես նաև  փաստաթղթային կեղծիքներով   տիրացել է  մի  շարք   ՀՀ քաղաքացիների սեփականությանը:

• ՀՀ Քննչական կոմիտեն, հանձինս իր աշխատակիցների, ճնշումներ և սպառնալիքներ է գործադրում այն անձնաց նկատմամբ, ովքեր բարձրաձայնում և վերոհիշյալ  նախկին  պաշտոնյաjին պատասխանտվության կանչելու պահանջ են ներկայացնում

Այսպես՝  Հ. Երիցյանի  և նրա  գործընկերներ  Վ. Վարդանյանի  և Ա. Այվազյանի  կողմից վաշխառությամբ և խարդախությամբ Գ. Թումասյանի, Զ. Մելիքյանի,  Զ. Գյոզալյանի, Ռ. Պետրոսյանի  գույքերին  տիրանալու  վերաբերյալ հարուցվել են   քրեական գործեր թիվ  17112714 (ՀՀ քրեական օրենսգրքի 325-րդ հոդվածի 1-ին մասով) , թիվ 13127214 (ՀՀ քրեական օրենսգրքի 213-րդ հոդվածի 1-ին մասի): Այս քրեական գործերին  հարուցվելուն զուգահեռ հարուցվել է մեկ այլ քրեական գործ թիվ  13142214 (ՀՀ քր. oրենսգրքի  182-րդ հոդվածի 3 մասի 2-րդ կետի)  իմ՝  «Վելես» Իրավապաշտպան ՀԿ նախագահի Մ. Պողոսյանի  նկատմամբ:

Հատկանշական է որ իմ նկատմամբ հարուցված  քրեական գործը 8 ամիս քննվել է, որի ընթացքում կատարվել են բազմաթիվ քրեադատավարական խախտումներ, մասնավորապես ինձ հետ առերեսումներ են կատարել զենքի առկայությամբ, բազմիցս առաջարկել են  հրաժարվել  Հ. Երիցյանի և  այլոց  վերաբերյալ  հարուցված քրեական գործերից: Քրեական գործի նյութերից կորել են ցուցմունքներ  և ստորագրություններ, ավելին քրեական գործի  քննության ընթացքում ձեռք են  բերվել տեղեկություններ Հ.Երիցյանի կողմից կատարված խոշոր չափերի տնտեսական հանցագործության վերաբերյալ, որը և կոծկվել է    քննիչի և   նրա վերադասի կողմից: Ինչպես նաև թիվ 13142214 քրեական գործի պատվիրատուները  հասկանալով որ  տեղի չեմ տալիս ճնշումներին ի վերջո կարճում են  իմ  վերաբերյալ ակնհայտ  անհիմն  հարուցված թիվ  13142214 քր. գործը, պատճառաբանելով որ անձը  ում  հաղորդման  վրա   հարուցվել էր  քրեական գործը չի ընկալել  իր տրված հաղորդման  բովանդակությունը:

Մեկ այլ նախկին  պաշտոնյաի՝ ՀՀ գլխավոր  դատախազ Ս. Օսիպովի որդուց՝  Վիկտոր Տեր-Հովսեփյանի գործողություններից տուժած օտարերկրյա ներդրողների  շահերի պաշտպանության  և  օտարերկրյա ներդրողների հաղորդումների  հիման վրա  հարուցված թիվ 13811015 քրեկան գործին  զուգահեռ,  ըստ  ՀՀ քննչական կոմիտեի  որոշ աշխատակիցների  որդեգրած արատավոր  պրակտիկայի,  իմ վերաբերյալ հարուցվեց մեկ այլ՝  թիվ 14149815 քրեական գործը, որի շրջանակներում առանց օրինական հիմքերի խուզարկության փորձեր իրականացվեցին  իմ  մտերիմներին պատկանող բնակարաններում,  թիվ 14149815 քրեական գործով  նույնիսկ  վկայի կարգավիճակ  չունեցող անձանց   գույքի վրա  կալանք կիրառվեց, իսկ ինձ հարցաքննելու միջոցով սպառնալիքներ  հնչեցվեցին իմ և իմ ընտանիքի ու մտերիմների հասցեին:

• Փաստացի ՀՀ քննչական կոմիտեն ակնհայտ, անհիմն քրեական գործեր հարուցելու միջոցով փորձում է  ինձ վրա  ճնշում գործադրել, որպեսզի ոչ ես, ոչ մեր կազմակերպությունը չզբաղվի  բարձրաստիճան պաշտոնյաների հակաօրինական գործողություններից  տուժած  ՀՀ և օտարերկրյա քաղաքացիների  շահերի պաշտպանությամբ, որպեսզի  գիտակցենք  որ  ցանկացած փորձ  բարձրաձայնելու նախկին և ներկա  պաշտոնատար  անձանց կողմից կատարված ապօրինությունները  հանգեցնելու է  հերթական քրեական գործի հարուցմանը իմ նկատմամբ

Հարուցված թիվ 14149815 քրեական գործի միջոցով իմ նկատմամբ սպառնալիքների և ճնշումների առնչությամբ ՀՀ Ազգային ժողովի պատգամավորի, ՀՀ Մարդու իրավունքների պաշտպանի, իրավապաշտպան միջազգային կազմակերպությունների դատապարտումները հանգեցրեցին նրան, որ 2015 թվականի հոկտեմբերի 19-ին թիվ թիվ 14149815 քրեական գործը կարճվեց: Այնուամենյանիվ, ՀՀ Քննչական կոմիտեն առավել խիստ շահագրգռվածություն է դրսևորում այդ ճնշումները շարունակելու համար և 2016 թվականի հունվարին վերացվել է  թիվ 14149815 քրեական գործը կարճելու որոշումը:

Ավելին՝ ՀՀ Քննչական կոմիտեի քննիչների կողմից հաստատվել է, որ այդ քրեական գործի հարուցումը ուղղակիորեն կապված է «Վելես» իրավապաշտպան կազմակերպության գործունեության հետ, որը պայքարում է համակարգային խնդիրների հետ և   նման ճնշումները օրինաչափ են:

Մենք հուսով ենք, որ ՀՀ Քննչական կոմիտեի նախագահը պատասխանատվություն կստանձնի իր ղեկավարած կառույցում քննիչների գործողությունների օրինականությունն ապահովելու և նրանց կողմից չարաշահումները,  հովհանավորչությունը  և   կոռուպցիոն  ռիսկերը կանխելու համար, իսկ միջազգային եւ տեղական իրավապաշտպան կազմակերպություններն իրենց ջանքերը կներդնեն ոլորտում առկա ապօրինություններն ու մարդու իրավունքների խախտումների դեմ պայքարի հարցում:

«Վելես» իրավապաշտպան հասարակական կազմակերպության

նախագահ Մարինա Պողոսյան

Դատարանում ՀՀ ոստիկանության շահերը պաշտպանող Սոնա Մելիքյանը կարծում է, որ եթե լրագրողներն իրեն լուսանկարեն, ապա լուսանկարը կհայտնվի սոցցանցերում, և ՀՀ քաղաքացիները իր մասին անհեթեթ մեկնաբանություններ կգրեն: Թե ինչու է Ոստիկանության ներկայացուցիչը վստահ, որ մեկնաբանությունները անհեթեթ են լինելու, պարզ չէ, սակայն հարկ է նշել, որ Սոնա Մելիքյանն ինքն է իր լուսանկարները հրապարակել «Ֆեյսբուքում», որոնք հասանելի են ոչ միայն իր վիրտուալ ընկերներին, այլև ամբողջ հանրությանը:

Սոնա Մելիքյանը ՀՀ վարչական դատարանում ներկայացնում է ՀՀ ոստիկանության շահերը, որի դեմ բողոք է ներկայացրել «Վելես» հասարակական կազմակերպության նախագահ Մարինա Պողոսյանը: Նա պնդում է, որ ՀՀ ոստիկանության ներկայացուցիչները ականատես են եղել, թե Դատական ակտերի հարկադիր կատարման ծառայության աշխատակիցներն ինչպես են բռնություն գործադրել իր նկատմամբ և անգործություն են ցուցաբերել, որևէ կերպ չեն միջամտել: Արդյունքում իրավապաշտպանին հասցվել է ֆիզիկական վնասվածք:

«Այնքան վիրավորական էր տեսնել, որ ոստիկանները կանգնած հետևում են, թե 4 հաստամարմին տղամարդիկ ինչպես են բռնություն գործադրում իմ նկատմամբ: Միակ բանը, որ ոստիկաններն անում էին, դա հեռախոսով նկարելն ու ծիծաղելն էր»,- հիշում է Մարինա Պողոսյանը:

Ոստիկանության դեմ հայցի քննությունը սկսվեց երկու միջնորդությամբ: Մարինա Պողոսյանի շահերը ներկայացնող փաստաբան Արթուր Սուքիասյանը նախ դատարանին միջնորդեց թույլատրել լրագրողներին տեսանկարահանել դատական նիստը: Ինչպես արդեն նշեցինք, ոստիկանության ներկայացուցիչն առարկեց՝ նշելով, որ իր համար ցանկալի չէ, որ իր լուսանկարները «լայքեն»:

Մարինա Պողոսյանի կարծիքով՝ Մելիքյանի առարկությունն անհիմն է. «Եթե մարդ չի ցանկանում, որ իր լուսանկարները լայքեն կամ մեկնաբանեն, դրանք սոցիալական ցանցերում չի տեղադրում: Մենք տեղյակ ենք, որ Դուք բավականին ակտիվ եք սոցիալական ցանցում»,- ոստիկանության ներկացուցչին ասաց իրավապաշտպանը:

Դատավոր Ռաֆիկ Խանդանյանը, այնուամենայնիվ, համարեց, որ Մելիքյանի՝ «լայքերից» զերծ մնալու իրավունքը առավել կարևոր է, քան լրատվամիջոցների աշխատանքն ու դատական նիստի թափանցիկությունը: Դատավորը մերժեց տեսանկարահանելու միջնորդությունը:

Հոդվածն ամբողջությամբ կարդացեք սկզբնաղբյուրում