Երբ Երեւանի կենտրոնում նման հայտարարություն հանդիպեցինք, սկզբում կարծեցինք, թե կատակ է, սակայն երբ կապվեցինք «Վելես» հասարակական կազմակերպության հետ, պարզվեց, որ քրեական գործի նյութերն իսկապես կորել են: «Անցյալ տարի Կենտրոնի քննչականում Հովհաննես Երիցյանի դիմումի հիման վրա քրեական գործ էին հարուցել, սակայն չկարողացան ապացուցել իմ մեղավորությունը, եւ գործը կարճվեց: Ես բողոքարկել եմ կարճման որոշումը, քանի որ գտնում եմ, որ մեղադրանք պետք է առաջադրվեր հենց Հովհաննես Երիցյանին՝ սուտ մատնություն անելու համար»,- մեզ հետ զրույցում ասաց ՀԿ նախագահ Մարինա Պողոսյանը:

Նրա խոսքով, Հովհաննես Երիցյանը, ով Ռոբերտ Քոչարյանի նախագահության շրջանում զբաղեցրել է ՀՀ քաղաքացիական ավիացիայի պետի պաշտոնը, դիտավորությամբ սուտ մատնություն է կատարել իր դեմ: «Թեեւ գործով ապացուցվել է, որ Երիցյանը կեղծ տեղեկություններ է հայտնել իմ մասին, քննիչը քրեական գործ չի հարուցել նրա դեմ, քանի որ գտել է, թե իբր Երիցյանը չի գիտակցել, որ սուտ մատնություն է կատարում: Սա ակնհայտ կեղծիք է, քանի որ Հովհաննես Երիցյանը վաղուց է փորձում վնասել ինձ, որովհետեւ մենք պաշտպանում ենք նրանից տուժած անձանց շահերը: Երիցյանը քաջ գիտակցել է, որ կեղծ տեղեկություններ է տարածում, եւ նա դա դիտավորյալ է արել, որպեսզի ճնշում գործադրի ինձ վրա»,- վստահ է Մարինա Պողոսյանը:

Իրավապաշտպանի խոսքով, Հովհաննես Երիցյանը գլխավորում է վաշխառությամբ եւ խարդախությամբ զբաղվող հանցախումբը, որի գործունեության արդյունքում բազմաթիվ ընտանիքներ հայտնվել են փողոցում. «Միայն մեր կազմակերպությանը դիմել են երեք ընտանիքներ, որոնք պնդում են, որ տոկոսով գումար են վերցրել Երիցյանից եւ զրկվել են իրենց տնից: Մենք բազմիցս բարձրաձայնել ենք այս հարցը, սակայն մեր իրավապահներն ուշադրություն չեն դարձնում, փոխարենը Երիցյանի կեղծ ցուցմունքների հիման վրա քրեական գործ էին հարուցել իմ դեմ»:

«Վելես» ՀԿ նախագահը վստահ է, որ քրեական գործի ընթացքում Երիցյանն այնպիսի ցուցմունքներ է տվել, որոնցով հնարավոր է հեշտությամբ ապացուցել, որ նախկին պաշտոնյան սուտ մատնություն է արել: «Գործն արդեն դատարանում է քննվում, իսկ քրեական գործի նյութերը պարզապես չկան, դուք պատկերացնո՞ւմ եք նման իրավիճակ: Ես լուրջ մտահոգություն ունեմ, որ այս ընթացքում քրեական գործի նյութերը փոփոխության են ենթարկվում, որպեսզի չբացահայտվեն իրենց կատարած հանցագործությունները»,- ասում է Մարինա Պողոսյանը:

Անի  ԱՌԱՔԵԼՅԱՆՆյութի աղբյուրը ` http://hraparak.am/?p=75317&l=am/

«Վելես» հասարակական կազմակերպության անդամները Երևանի կենտրոնում պաստառներ են փակցրել հետևյալ բովանդակությամբ. «Փնտրվում է Կենտրոնի քննչական բաժնում իրավապաշտպան Մարինա Պողոսյանի դեմ սարքված քրեական գործի նյութերը։ Գտնողին, խնդրում ենք, ներկայացնել Կենտրոնի դատարան։ Խոստանում ենք դրամական պարգև»։

Մարինա Պողոսյանը «168 Ժամի» հետ զրույցում մանրամասնեց, թե որ քրեական գործի մասին է խոսքը, և, թե ինչու են իրենք փնտրում գործի նյութերը։

«Սա այն քրեական գործն է, որով փորձել են ճնշում գործադրել մեր կազմակերպության և անձամբ իմ նկատմամբ, քանի որ մենք զբաղվում ենք վաշխառության դեմ պայքարով, իսկ վաշխառուների պարագլուխ Հովհաննես Երիցյանին, բնականաբար, դուր չի եկել մեր գործունեությունը, և նա պարզապես սուտ մատնություն էր արել իմ դեմ»։ Քաղաքացիական ավիացիայի նախկին պետ Հովհաննես Երիցյանը Ոստիկանություն հաղորդում էր տվել այն մասին, թե իբր Մարինա Պողոսյանը շորթում է կատարել մի քանի անձանցից` սպառնալով և վախեցնելով նրանց։ Քրեական գործ հարուցվել էր, սակայն Մարինա Պողոսյանին մեղադրանք չէր առաջադրվել, քանի որ բոլոր 4 անձինք, ումից, ըստ Երիցյանի, Պողոսյանը «շորթում» էր կատարել, իրենց ցուցմունքներում հերքել են Երիցյանի հայտնած տեղեկությունները։

Մարինա Պողոսյանն իր հերթին` հաղորդում է ներկայացրել հանցագործության մասին` հայտնելով, որ Հովհաննես Երիցյանը սուտ մատնություն է կատարել։ Երիցյանի դեմ, սակայն, գործ չի հարուցվել, քննիչը գտել է, որ նախկին պաշտոնյան դիտավորությամբ չի մեղադրել Պողոսյանին հանցագործության մեջ։
«Պատկերացնո՞ւմ եք, որ Հովհաննես Երիցյանն իբր սխալ է ընկալել չորս հոգուց լսած տեղեկությունը և ենթադրել է, որ ես շորթում եմ կատարել, և դիմել է Ոստիկանություն։ Նման բան չի կարող լինել, նա դիտավորությամբ է դա արել, որպեսզի ճնշում գործադրի մեզ վրա։ Եթե ես չորս անձից շորթում կատարած լինեի, նրանք կդիմեին Ոստիկանություն, Երիցյանն ինչո՞ւ է նրանց փոխարեն դա արել»,- ասում է «Վելես» հ/կ-ի նախագահը։

Վերջինս, ի դեպ, մինչ օրս հնարավորություն չի ունեցել ծանոթանալու քրեական գործի նյութերին, քանի որ, թեև գործն արդեն դատական փուլում է, գործի նյութերը դեռևս չեն փոխանցվել դատարան։ «Ես լուրջ մտավախություն ունեմ, որ ՀՀ գլխավոր դատախազությունում կփոխվեն գործի նյութերը, քանի որ Հովհաննես Երիցյանը խայտառակ ցուցմունքներ է տվել, և նման ցուցմունքները հրապարակվելուց հետո նա չի կարող խուսափել պատասխանատվությունից»,- վստահ է իրավապաշտպանը։

Մարինա Պողոսյանը նշում է, որ իրենք արդեն համոզվել են` հենց Դատախազությունն է հովանավորում Երիցյանին։ «Մենք այս մասին բաց նամակ գրեցինք, տեղեկացրեցինք ՀՀ գլխավոր դատախազին, սակայն նա այդպես էլ անհաղորդ մնաց։ Գործի նյութերը մինչև հիմա Դատախազությունում են, և ես խիստ կասկածում եմ, որ այնտեղ հիմա կեղծիքներ են արվում։ Ինչո՞ւ է Դատախազությունը պահում գործի նյութերն իր մոտ, եթե վաղուց հաստատել է քրեական գործի կարճման վերաբերյալ որոշման օրինականությունը»,- հարցնում է իրավապաշտպանը։

Սկզբնաղբյուրը`

Իրավապաշտպանը խոստանում է դրամական պարգև

«Վելես» հասարակական կազմակերպության անդամները ստիպված են եղել հայտարարություն տալ կորած քրեական գործի նյութերի մասին՝ գտնողին խոստանալով դրամական պարգև: Կազմակերպության նախագահ Մարինա Պողոսյանը պնդում է, որ Ոստիկանության Կենտրոնի քննչական բաժնում նախ իր դեմ գործ են սարքել, ապա կարճել են քրեական գործը, իսկ գործի նյութերն «անհետացել են»:

«Ամիսներ շարունակ ես չեմ կարողանում ծանոթանալ քրեական գործի նյութերին, դատախազությունում լավ են հասկանում, որ երբ մենք ծանոթանանք դրանց, այնքան ապօրինություններ կբացահայտենք, դրա համար էլ գործի նյութերը պարզապես թաքցնում են ինձնից»,- «Ժամանակի» հետ զրույցում ասաց Մարինա Պողոսյանը:

«Վելես» ՀԿ-ն ակտիվ պայքար է մղում վաշխառուների և խարդախների դեմ, պաշտպանում է նրանց զոհ դարձած անձանց շահերը: Կազմակերպության նախագահ Մարինա Պողոսյանը բազմիցս դիմել է իրավապահ մարմիններին՝ կոչ անելով պատասխանատվության ենթարկել վաշխառուներին, փոխարենը ոստիկանությունում քրեական գործ է հարուցվել հենց իր դեմ: «Մենք մշտապես հայտարարել ենք, որ ՀՀ քաղաքացիական ավիացիայի նախկին պետ Հովհաննես Երիցյանը տարիներ շարունակ զբաղվել է վաշխառությամբ, բազմաթիվ տուժած մարդիկ են մեզ դիմել: Երիցյանն էլ իր հերթին փորձեց ինձ վախեցնել՝ քրեական գործ հարուցելով»,- ասաց Մարինա Պողոսյանը:

Նրա խոսքով՝ Երիցյանը սուտ մատնություն է արել իր դեմ և պետք է դրա համար ևս պատասխանատվության ենթարկվի: «Նա հայտարարել էր, թե ես շորթում եմ արել, և որպես իր ասածի ապացույց տվել էր չորս անձանց անուն, ովքեր իբր պետք է հաստատեին նրա ասածները, սակայն այդ չորսն էլ եկել և միանգամայն այլ ցուցմունքներ են տվել, նույնիսկ իր սանիկը իր դեմ է ցուցմունք տվել, այսքանից հետո քննիչը քրեական գործ չի հարուցել Երիցյանի նկատմամբ, քանի որ գտել է, որ նա դիտավորությամբ չի կատարել սուտ մատնությունը»,- նշեց իրավապաշտպանը:

Երիցյանի դիմումի հիման վրա հարուցված քրեական գործը կարճվել է, քանի որ չի հաջողվել ապացուցել շորթում կատարելու փաստը: Իրավապաշտպանը, սակայն, բողոքարկում է քրեական գործի կարճման որոշումը դատարանում: «Ես գործի ընթացքում հայտնել եմ, որ սուտ մատնություն է կատարվել, և պնդում եմ, որ քրեական գործ պետք է հարուցվի այդ հիմքով, դրա համար էլ մենք բողոքարկում ենք այդ որոշումը և պայքարելու ենք մինչև վերջ»,- ասաց նա:

Քրեական գործը կարճելու որոշման դեմ բերված բողոքը քննվում է Կենտրոն և Նորք-Մարաշ վարչական շրջանների ընդհանուր իրավասության դատարանում: Քրեական գործի նյութերը, սակայն, դեռևս դատարանին չեն փոխանցվել: «Քանի որ դատարանն էլ չի կարողանում ստանալ գործի նյութերը, մենք հայտարարություն ենք տարածել, որ գտնողին տալու ենք դրամական պարգև»,- ասաց «Վելես» ՀԿ-ի նախագահը:

Սկզբնաղբյուրը`http://www.1in.am/1576440.html

Այսօր մարտի 17-ն է, շատերիս համար հերթական օրացույցային օր, սակայն մեր կողքին ապրում է մի ընտանիք, ում համար այս օրը սևով է ներկված: Ուղղեմ սխալս՝ այդ ընտանիքը ոչ թե ապրում, այլ գոյատևում է, քանի որ ուղիղ մեկ տարի առաջ այս օրը այդ ընտանիքը ոչնչացվել է: Մելիքյանների ընտանիքում չորս կին էին ապրում, տան տղամարդը մահացել էր, մնացել էին տատիկը, մայրը և երկու դուստրերը:

Դուստրերից մեկը տոկոսով գումար էր վերցրել, որպես գրավ իրենց տան վերաբերյալ շինծու առուվաճառքի պայմանագիր էր կնքել, պայմանավորվել էին, որ գումարը վերադարձնելուց հետո տունը պետք է հետ վերադարձնեին: Սակայն դատարանից ստացված ծանուցագրից տեղեկացան, որ իրենց տան նոր տերը ցանկանում է վտարել իրենց: Դատարանը ընտանիքի դեմ էր որոշում կայացրել:
2014 թվականի մարտի 17-ն էր: Դատական ակտերի հարկադիր կատարման ծառայակիցները բառիս բուն իմաստով ներխուժեցին տարածք և սկսեցին բռնությամբ դուրս շպրտել տան տատիկին՝ ում վտարման վերաբերյալ դատարանը որոշում չէր կայացրել:

Այսօր այս ընտանիքի անդամները իրարից հեռու են ապրում, պաշտոնյաներին հասցեագրած նամակները ստորագրում են անհասցե, քանի որ չունեն հասցե, չունեն գրանցում: 2014 թ. մարտի 17-ից սկսած այս ընտանիքն այլևս չկա, նրանք պարզապես գոյատևում են, գոյատևում՝ արդարության սպասումով:
Սկզբնաղբյուրը`

Նրանք պարզապես գոյատևում են՝ արդարության սպասումով

«Ակնհայտ էր, որ դատավորին ընդհանրապես չէր հետաքրքրում գործի նյութերը, մենք բազմաթիվ իրավախախտումներ էինք վկայակոչում, սակայն նա չէր ցանկանում լսել, անընդհատ մեզ հորդորում էր, որ կարճ կապեինք»,- «168.am»-ին է պատմում «Վելես» հասարակական կազմակերպության նախագահ Մարինա Պողոսյանը:

Նրա կարծիքով, Արաբկիր և Քանաքեռ-Զեյթուն ընդհանուր իրավասության դատարանի դատավոր Լևոն Ավետիսյանը նախօրոք գիտեր, թե ինչ որոշում է կայացնելու, դրա համար էլ շտապել է ավարտել բողոքի քննությունը: «Ժոողովրդական խոսքով ասած՝ դատավորը «վռազ էր», երևի մտածել է, որ արդարադատությունը կսպասի… հավանաբար շտապում էր «վերևներին» զեկուցել, որ ամեն ինչ իրենց սրտով է արել»,- ասում է Մարինա Պողոսյանը:

Հիշեցնենք, որ 2014 թ. մարտի 17-ին Երևանի կենտրոնում դատական ակտերի հարկադիր կատարման ծառայակիցները բռնություն էին գործադրել 75-ամյա կնոջ և նրա շահերը պաշտպանող Մարինա Պողոսյանի նկատմամբ: Հատուկ քննչական ծառայությունում հարուցվել էր քրեական գործ, որը կարճ ժամանակ անց կարճվել էր:

Մարինա Պողոսյանը գտնում է, որ կարճման որոշումն անօրինական է և այն բողոքարկում է դատական կարգով:

«168.am»-ն անդրադարձել է քրեական գործում առկա բացթողումներին , իսկ երեկ կայացած դատական նիստում Մարինա Պողոսյանի փաստաբան Արթուր Սուքիասյանը ներկայացրել է նախաքննական մարմնի թույլ տված այլ թերացումները:
«Այնպիսի տպավորություն է, որ նախաքննական մարմինը նույնիսկ չի գիտակցել, թե ինչ իրավունքների խախտման մասին է խոսքը, և գործի քննությունը տարել է այլ ուղղությամբ: Այստեղ քննարկվում է Մարինա Պողոսյանի՝ տվյալ տարածքում գտնվելու օրինական լինելու հարցը, այնինչ Մարինա Պողոսյանը որևէ հավակնություններ չի ունեցել այդ տարածքի նկատմամբ, նա այդտեղ է ժամանել քաղաքացիների ահազանգով, գործել է որպես իրավապաշտպան, փոխարենն արժանացել է բռնության»,- ասաց փաստաբանը:

Նրա խոսքով՝ ԴԱՀԿ ծառայակիցները խախտել են Մարինա Պողոսյանի ազատ տեղաշարժվելու իրավունքը՝ նրան փակելով սենյակներից մեկում, վնաս են հասցրել նրա արժանապատվությունը՝ նրան գրկելով և բետոնե աստիճանների վրա շպրտելով, ինչպես նաև հասցրել են մարմնական վնասվածք, ինչն արձանագրվել է դատաբժշկական փորձաքննությամբ:

Քրեական գործի կարճման օրինականությունը հաստատած դատախազ Արթուր Երիցյանը, թեև ընդունում է, որ ԴԱՀԿ ծառայակիցները վնաս են հասցրել թե՛ Մարինա Պողոսյանին, թե՛ տարեց կնոջը, այնուամենայնիվ, այդ վնասը էական չի համարում:
«Մարինա Պողոսյանը խոչընդոտել է ԴԱՀԿ ծառայակիցների աշխատանքը, այդ պատճառով էլ նրան հեռացրել են տարածքից»,- հայտարարեց դատախազը:

«ԴԱՀԿ ծառայակիցները ժամանել էին այդ հասցե, որպեսզի վտարեին Կարինե և Զինաիդա Մելիքյաններին: Վերջիններս իմ հորդորով ինքնակամ լքել էին տարածքը, և ԴԱՀԿ ծառայակիցներն այլևս այնտեղ անելիք չպետք է ունենային, այնպես որ ես չէի կարող խոչընդոտել նրանց օրինական գործողություններին»,- ասում է Մարինա Պողոսյանը:

Երեկ հապճեպորեն քննված գործից հետո դատավոր Լևոն Ավետիսյանը մերժեց իրավապաշտպանի բողոքը: «Ես չեմ էլ զարմանում, որ մերժեց, որովհետև դատավորի վերաբերմունքից զգացվում էր, որ իրեն գործն ընդհանրապես չի հետաքրքրում, նա մի քանի անգամ ինձ ընդհատեց՝ թույլ չտալով ներկայացնել գործում առկա կարևոր բացթողումները»,- ասում է իրավապաշտպանը:

«Վելես» հասարակական կազմակերպության նախագահը պատրաստվում է բողոքարկել դատարանի որոշումը. «Հուսով եմ, որ Վերաքննիչ դատարանի դատավորները նույնքան անհաղորդ չեն լինի ու արդար որոշում կկայացնեն՝ հանուն Հայաստանի Հանրապետության, այլ ոչ թե ինչ-որ ուժերի…»:

Սկզբնաղբյուրը`

Արդարադատությունը կսպասի… դատավորը «վռազ էր»

76-ամյա Զինաիդա Գյոզալյանի և «Վելես» իրավապաշտպան կազմակերպության նախագահ Մարինա Պողոսյանի նկատմամբ բռնություն գործադրելու առթիվ ՀՔԾ-ն քրեական գործի հարուցումը մերժելու մասին որոշում էր ընդունել, ինչից հետո Մարինա Պողոսյանը բողոքարկել է որոշումը։ Այսօր Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը՝ հանձին դատավոր Լևոն Ավետիսյանի, մերժել է բողոքը՝ այն համարելով անհիմն:
Ըստ Պողոսյանի՝ 2014 թվականի մարտի 17-ին ԴԱՀԿԾ աշխատակիցներն Աբովյան փողոցի կտորեղենի խանութում բնակվող ընտանիքին վտարելու ժամանակ նախ բռնություններ են կիրառել 75-ամյա Զինաիդա Գյոզալյանի նկատմամբ, ապա, երբ ինքը փորձել է միջամտել, իրեն կողպել են սենյակում: Այնուհետև ԴԱՀԿԾ աշախատակիցները բռնություն են կիրառել նաև Պողոսյանի նկատմամբ՝ նրան կացարանից դուրս հանելով և աստիճաններին նետելով: Քննիչը համարել էր, որ ԴԱՀԿԾ աշխատակիցները «նուրբ գրկել են իրավապաշտպանին»:
Դատարանում բողոքը ներկայացնելով՝ Մարինա Պողոսյանը նշել է, որ քննիչ Սարգսյանը ոչ միայն անգործություն է ցուցաբերել, օրինակ՝ առերեսում չանելով, հաշվի չառնելով այն, որ իրենք այդ օրը մի քանի անգամ զանգահարել են ոստիկանություն և այլն, այլև կատարել է պաշտոնական կեղծիք. հրապարակել է չորս վկաների կողմից ստորագրված նույնական ցուցմունքներ:
Պողոսյանը նշել է նաև, որ ինքն այդ տանը գտնվում էր որպես իրավապաշտպան, իր անունը չկար դատական որոշման մեջ, և ԴԱՀԿԾ աշխատողներն իրավունք չունեին իրեն դուրս հանել։
Դատարանում ՀՔԾ որոշումը պաշտպանում էր դատախազ Երիցյանը: Վերջինս հակադարձել է, որ Մարինա Պողոսյանը խոչընդոտել է ԴԱՀԿԾ ներկայացուցիչների աշխատանքը, այդ պատճառով էին նրա նկատմամբ «ստիպված» ուժ կիրառել:
Մարինա Պողոսյանը դիմելու է Վերաքննիչ դատարան:
Սկզբնաղբյուրը`http://www.epress.am/2015/03/06/263175.html

«Վելես» հասարակական կազմակերպությունն ամիսներ շարունակ իրականում պայքարել է ոչ թե վաշխառուների և խարդախների խմբի, այլ նրանց հովանավորող դատախազության ներկայացուցիչների դեմ: Այս մասին ասված է վաշխառուների գործողություններից տուժած անձանց խնդիրներով զբաղվող «Վելես» ՀԿ֊ի նախագահ Մարինա Պողոսյանի (լուսանկարում) բաց նամակում, որը հղված է ՀՀ գլխավոր դատախազ Գևորգ Կոստանյանին։
«Ավելին՝ առկա խնդիրների մասին փորձել ենք տեղեկացնել նաև անձամբ Ձեզ, սակայն Ձեր անտարբեր և անհաղորդ կեցվածքը մեզ մոտ կասկածներ առաջացրեց, որ վերոնշյալ խումբն իր հանցավոր գործունեությունը ծավալում է ՀՀ գլխավոր դատախազության հովանավորությամբ կամ անգործության շնորհիվ», ֊ նշում է Պողոսյանը:
Նա ընդգծում է, որ խոսքը վերաբերում է Հովհաննես Երիցյանի և Արտավազդ Այվազյանի մասին մի շարք քաղաքացիների բողոքներին, որոնց հիման վրա հարուցվել են քրեական գործեր, սակայն կարճ ժամանակ անց կարճվել են, իսկ գործը վերահսկող դատախազները հաստատել են քրեական գործերի կարճման օրինականությունը:
«Սակայն հետագայում, երբ այդ կարճման որոշումներից մեկը բողոքարկվել է դատարաններում, պարզվել է, որ քննիչը չի կատարել օբյեկտիվ և բազմակողմանի քննություն: Տվյալ գործը վերադարձել է նախաքննության փուլ, և մենք լիահույս ենք, որ գոնե այս նամակի հրապարակումից հետո դատախազությունը չի շարունակի աչք փակել կամ գուցե և հովանավորել մի քանի ընտանիքների կողմից վաշխառության մեջ մեղադրվող անձանց և պատշաճ կերպով վերահսկողություն կսահմանի նախաքննական մարմնի նկատմամբ», ֊ ընդգծում է ՀԿ֊ի ղեկավարը:
Նամակում նշվում է, որ մեկ այլ գործով դատախազությունը դարձյալ աչք է փակել ոչ օբյեկտիվ և բազմակողմանի իրականացված քրեական գործի նկատմամբ, որը դարձյալ վերաբերում է Երիցյանին և Այվազյանին:
«Այս պարագայում վերջիններիս կամքը իրականացնող (ամենևին ոչ դատական ակտը, քանի որ նման ակտ գոյություն չունի) Դատական ակտերի հարկադիր կատարման ծառայության աշխատակիցները բռնության էին ենթարկել անձամբ ինձ և 75-ամյա տարեց կնոջը՝ չարաշահելով իրենց պաշտոնեական դիրքը: Դեպքի առթիվ հարուցվել էր քրեական գործ, որը ևս կարճվել է և կարճման օրինականությունը կրկին հաստատվել է դատախազության կողմից:
Ավելի քան զարմանալի է, որ գործը ստուգող դատախազը չի նկատել, որ Հատուկ քննչական ծառայության քննիչը գործը կարճել է առանց որևէ առերես հարցաքննություն իրականացնելու, թեև գործում բազմաթիվ են հակասությունները: Ավելին, դատախազն իբր չի նկատել, որ մի քանի անձանց տրված բացատրություններն ու ցուցմունքները գրված են մեկ անձի կողմից, ում թեթև ձեռքով էլ այս գործը փակվել է: Կարճման որոշումը ևս բողոքարկվում է դատարանում: Համոզված ենք, որ առաջիկայում այս գործով ևս կապացուցվի դատախազության անգործությունը», ֊ ընդգծում է Պողոսյանը:
Նամակում վերջինս հույս է հայտնում, որ Գևորգ Կոստանյանի կարողություններն ու հեղինակությունը կբավականացնեն, որպեսզի ՀՀ գլխավոր դատախազն անձամբ բացահայտի, թե նրա գլխավորած կառույցում ովքեր են հովանավորում վերոնշյալ զույգին և «ստվերում առանց այդ էլ վստահություն չներշնչող ՀՀ գլխավոր դատախազության համբավը»:
Պողոսյանը նաև պատրաստակամություն է հայտնում Կոստանյանին ներկայացնել ինչպես վերոնշյալ գործերի մասով, այնպես էլ բազմաթիվ այլ դրվագներով դատախազության անգործությունն ապացուցող փաստեր և փաստաթղթեր:

Սկզբնաղբյուրը`http://www.epress.am/2015/02/23/262744.html

ՀՀ գլխավոր դատախազ
Գեւորգ Կոստանյանին

«Վելես» իրավապաշտպան
հասարակական կազմակերպության
նախագահ Մարինա Պողոսյանից

Բաց նամակ

Հարգելի պարոն Կոստանյան, «Վելես» հասարակական կազմակերպությունը վերջերս ամփոփեց իր գործունեության մեկ տարին եւ հետ հայացք գցելով մեր կատարած աշխատանքին, մենք եկանք այն եզրակացման, որ ամիսներ շարունակ մենք պայքարել ենք իրականում ոչ թե վաշխառուների եւ խարդախների խմբի, այլ նրանց հովանավորող դատախազության ներկայացուցիչների դեմ: Ավելին, առկա խնդիրների մասին փորձել ենք տեղեկացնել նաեւ անձամբ Ձեզ, սակայն Ձեր անտարբեր եւ անհաղորդ կեցվածքը մեզ մոտ կասկածներ առաջացրեց, որ վերոնշյալ խումբն իր հանցավոր գործունեությունը ծավալում է ՀՀ գլխավոր դատախազության հովանավորությամբ կամ անգործության շնորհիվ:
Եվ որպեսզի մեր հայտարարությունը մերկապարանոց չհնչի, ներկայացնենք մանրամասներ: Խոսքը վերաբերում է Հովհաննես Երիցյանի եւ Արտավազդ Այվազյանի մասին մի շարք քաղաքացիների բողոքներին, որոնց վերաբերյալ հարուցվել են քրեական գործեր, սակայն կարճ ժամանակ անց կարճվել են, իսկ գործը վերահսկող դատախազները հաստատել են քրեական գործերի կարճման օրինականությունը:
Սակայն հետագայում, երբ այդ կարճման որոշումներից մեկը բողոքարկվել է դատարաններում, պարզվել է, որ քննիչը չի կատարել օբյեկտիվ եւ բազմակողմանի քննություն: Տվյալ գործը վերադարձել է նախաքննության փուլ եւ մենք լիահույս ենք, որ գոնե այս նամակի հրապարակումից հետո դատախազությունը չի շարունակի աչք փակել կամ գուցե եւ հովանավորել մի քանի ընտանիքների կողից վաշխառության մեջ մեղադրվող անձանց եւ պատշաճ կերպով վերահսկողություն կսահմանի նախաքննական մարմնի նկատմամբ:

Մեկ այլ գործով, դատախազությունը դարձյալ աչք է փակել ոչ օբյեկտիվ եւ բազմակողմանի իրականացված քրեական գործի նկատմամբ, որը դարձյալ վերաբերում է վերոնշյալ զույգին: Այս պարագայում վերջիններիս կամքը իրականացնող (ամենեւին ոչ դատական ակտը, քանի որ նման ակտ գոյություն չունի) Դատական ակտերի հարկադիր կատարման ծառայության աշխատակիցները բռնության էին ենթարկել անձամբ ինձ եւ 75-ամյա տարեց կնոջը՝ չարաշահելով իրենց պաշտոնեական դիրքը: Դեպքի առթիվ հարուցվել էր քրեական գործ, որը եւս կարճվել է եւ կարճման օրինականությունը կրկին հաստատվել է դատախազության կողմից:

Ավելի քան զարմանալի է, որ գործը ստուգող դատախազը չի նկատել, որ Հատուկ քննչական ծառայության քննիչը գործը կարճել է առանց որեւէ առերես հարցաքննություն իրականացնելու, թեեւ գործում բազմաթիվ են հակասությունները: Ավելին, դատախազն իբր չի նկատել, որ մի քանի անձանց տրված բացատրություններն ու ցուցմունքները գրված են մեկ անձի կողմից, ում թեթեւ ձեռքով էլ այս գործը փակվել է: Կարճման որոշումը եւս բողոքարկվում է դատարանում: Համոզված ենք, որ առաջիկայում այս գործով եւս կապացուցվի դատախազության անգործությունը:
Եվս մեկ փաստ. Հովհաննես Երիցյաննն ու նրա շայկան սուտ մատնություն էին կատարել՝ ինձ կեղծ մեղադրանքներ առաջադրելով առանձնապես ծանր հանցագործության մեջ: Գործի քննության ընթացքում Հովհաննես Երիցյանը բառիս բուն իմաստով փախել է ինձ հետ առերես հարցաքննությունից եւ փաստորեն, առանց առերես հարցաքննությունն ավարտելու քննիչը գործը կարճել է եւ արդեն երրորդ անգամ կարճման օրինականությունը հաստատվել է դատախազության կողմից: Այս գործով եւս ընթանում է դատաքննություն:

Անկախ նրանից, թե դատարանում ինչ որոշումներ կկայացվեն, մեզ համար ակնհայտ է, որ դատախազությունը շահագրգռված չէ Հովհաննես Երիցյան-Արտավազդ Այվազյան զույգին վերաբերող գործերով օբյեկտիվ եւ բազմակողմանի քննություն անցկացնելու մեջ, որի ընթացքում գուցե կբացահայտվեր նաեւ, թե նախկին պաշտոնյան ինչ ճանապարհով է կուտակել մի քանի միլիոն դոլարի հասնող կարողությունը:
Հարգելի պարոն Կոստանյան, հուսով ենք, որ Ձեր կարողություններն ու հեղինակությունը կբավականացնեն, որպեսզի Դուք անձամբ բացահայտեք, թե Ձեր գլխավորած կառույցում ովքեր են հովանավորում վերոնշյալ տխրահռչակ զույգին եւ ստվերում առանց այդ էլ վստահություն չներշնչող ՀՀ գլխավոր դատախազության համբավը: Հակառակ դեպքում մենք կարող ենք օգնել Ձեզ այդ հարցում՝ տալով նաեւ կոնկրետ անձանց անուններ, ովքեր հնարավոր է, որ գործում են Ձեր թիկունքում:

Հ.Գ. – Պատրաստ ենք անձամբ Ձեզ ներկայացնել ինչպես վերոնշյալ գործերի մասով, այնպես էլ բազմաթիվ այլ դրվագներով դատախազության անգործությունն ապացուցող փաստեր եւ փաստաթղթեր:

«Վելես» իրավապաշտպան կազմակերպություն

Սկզբնաղբյուրը`

Գլխավոր դատախազությո՞ւնն է հովանավորում վաշխառուների խմբին

Բաց նամակ`ՀՀ գլխավոր դատախազ Գևորգ Կոստանյանին

http://armtimes.com/hy/read/60087

http://www.1in.am/1555997.html

http://galatv.am/hy/news/glxavor-dataxazutyuny-vashxaruneri-ew-xardaxneri-xmbi-hovanavor-ravapashtpan-kazmakerputyun/

http://168.am/2015/02/23/459779.html

Քիչ առաջ Էրեբունի և Նուբարաշեն վարչական շրջանների ընդհանուր իրավասության դատարանում հրապարակվեց Օֆելյա Չփլախյանի միջնորդության վերաբերյալ դատավոր Տաթևիկ Ստեփանյանի կայացրած որոշումը: Դատավորը մերժեց քաղաքացու խնդրանքը և չկասեցրեց վտարման մասին դատական ակտերի հարկադիր կատարողների որոշումը:

Հիշեցնենք, որ ըստ վտարման թերթի՝ Չփլախյաններին պետք է վտարեին վաղը՝ փետրվարի 12-ին: Սակայն «Առաջին լրատվական»-ի նախորդ հրապարակումից հետո ԴԱՀԿ ծառայության դիրքորոշումը փոխվել է: Սիրանուշ Չփլախյանը դիմել էր ՀՀ գլխավոր հարկադիր կատարող Միհրան Պողոսյանին, որը երեկ որոշել է ժամանակ տրամադրել ընտանիքին:

«Ամեն դեպքում, մեր ճակատագիրը մնում է անորոշ, քանի որ մեր վտարումը ոչ թե կասեցվել է, այլ հետաձգվել երկու շաբաթով: Եթե Վարչական դատարանից էլ մերժում ստացանք, փողոցում ենք հայտնվելու»,- ասում է Սիրանուշ Չփլախյանը:

Սկզբնաղբյուրը`http://www.1in.am/1546370.html

Հատուկ քննչական ծառայությունում, պարզվում է, լավ են յուրացրել համակարգչային հմտությունները, մասնավորապես՝ Copy-Past անելը: Օրինակ, ավագ քննիչ Սամվել Սարգսյանը ԴԱՀԿ ծառայակիցների գործը քննելիս պարզապես Copy-Past է արել նույն ցուցմունքը՝ գրեթե աննշան փոփոխություններ կատարելով: Քննիչի թեթև ձեռքով ԴԱՀԿ երեք ծառայակիցների ցուցմունքները բառ առ բառ համընկնում են: Սա փաստում է, որ ՀՔԾ-ում, ըստ էության, լիարժեք քննություն չի իրականացվել ԴԱՀԿ ծառայակիցների կողմից տարեց կնոջ և իրավապաշտպանի նկատմամբ կիրառված բռնության գործով:

Հիշեցնենք, որ անցած տարվա մարտի 17-ին Երևանի Աբովյան փողոցում գործող կտորեղենի խանութից վտարում իրականացնելիս Դատական ակտերի հարկադիր կատարման ծառայակիցները բռնություն էին կիրառել 75-ամյա կնոջ և «Վելես» հասարակական կազմակերպության նախագահ Մարինա Պողոսյանի նկատմամբ: Դեպքի առթիվ Հատուկ քննչական ծառայությունում հարուցվել էր քրեական գործ՝ ՀՀ քրեական օրենսգրքի 309-րդ հոդվածի 2-րդ մասով (պաշտոնեական լիազորությունները չարաշահելը, որը զուգորդվել է բռնություն գործադրելով) :

«Երբ ես ծանոթացա քրեական գործի նյութերին, պարզապես ապշել էի. ԴԱՀԿ բոլոր ծառայակիցները ոչ թե միանման, այլ բառացի նույն ցուցմունքն էին տվել: Աշխարհում դեռ չի եղել նման բան, որ երեք տարբեր մարդիկ միանգամայն նույն բառերով և նույն հաջորդականությամբ ցուցմունք տան: Ակնհայտ է, որ քննիչն ինքն է գրել բոլորի ցուցմունքները, իսկ ավելի ճիշտ՝ չի գրել, այլ կրկնօրինակել է տեքստը»,- 168.am-ի հետ զրույցում ասաց Մարինա Պողոսյանը:

Իրավապաշտպանը ցույց է տալիս քրեական գործի նյութերը՝ առանձնացնելով բոլոր այն էջերը, որոնք չեն տարբերվում ոչ միայն բովանդակությամբ, այլև նախադասությունների ու բառերի շարվածքով:

Copy-Past-ը քննիչ Սամվել Սարգսյանի միակ նորարարությունը չէ. նա քրեական գործի վարույթը կարճել է՝ չնայած առկա բազմաթիվ հակասությունների: Քննիչը որևէ առերես հարցաքննություն չի արել՝ ի սկզբանե վստահ լինելով, որ ԴԱՀԿ ծառայակիցները չեն չարաշահել իրենց պաշտոնեական լիազորությունները, որ վերջիններս ոչ թե բռնություն են կիրառել, այլ պարզապես «գրկած դուրս են բերել կանանց»՝ ինչպես իրենք են նշել իրենց ցուցմունքներում:

Մարինա Պողոսյանը բռնության արդյունքում մարմնական վնասվածքներ է ստացել, գործով տուժող է ճանաչվել, սակայն նորարար քննիչ Սամվել Սարգսյանը նրան չի ծանոթացրել ոչ գործի նյութերի, ոչ էլ վարույթը կարճելու որոշման հետ:

Տուժող Մարինա Պողոսյանը բողոքարկել է քրեական գործը կարճելու մասին որոշումը Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում: Դատական նիստը նշանակված է փետրվարի 11-ին՝ ժամը 10:00-ին: «Մենք չենք բավարարվելու միայն քրեական գործի կարճման որոշումը բողոքարկելով, կդիմենք նաև Ազգային անվտանգության ծառայություն, որպեսզի նրանք պարզեն, թե արդյոք այս խայտառակ թերի գործը քննիչի անգրագիտությա՞ն, թե՞ կաշառակերության արդյունքն է»,- ասում է «Վելես» հ/կ-ի նախագահը:

Ի դեպ, մեր տեղեկություններով՝ քրեական գործի վարույթի իրականացման օրերին Սամվել Սարգսյանը բնակարան է ձեռք բերել էլիտար շենքում:

Իզաբելլա Թորոսյան

Սկզբնաղբյուրը`

ՀՔԾ-ի Copy-Past-ը

Անցած տարվա մարտի 17-ին Երևանի կենտրոնում Դատական ակտերի հարկադիր կատարման ծառայակիցները բռնություն էին կիրառել 75-ամյա կնոջ և իրավապաշտպան Մարինա Պողոսյանի նկատմամբ: Դեպքի առթիվ Հատուկ քննչական ծառայությունում հարուցվել էր քրեական գործ, որը հետագայում կարճվել էր:

Մեր ձեռքի տակ են քրեական գործով անցնող տուժողների և վկաների ցուցմունքները, որոնք բացահայտում են հարկադիր կատարողների ցինիզմն ու «հնարամտությունը»: Պարզվում է, որ նրանք ոչ թե բռնություն են գործադել, այլ ընդամենը «տարածքից գրկած դուրս են հանել կանանց»:

«Նախ՝ ոչ թե դուրս են հանել, այլ շպրտել են բետոնե աստիճանների վրա, որի արդյունքում ես ստացել եմ մարմնական վնասվածքներ, որի վերաբերյալ առկա է դատաբժշկական փորձաքննության եզրակացությունը,- «Առաջին լրատվական»-ին հայտնեց «Վելես» հասարակական կազմակերպության նախագահ Մարինա Պողոսյանը՝ շարունակելով:- Եվ երկրորդ՝ եթե գործը քննող քննիչի և դատախազի համար նորմալ է, որ օտար տղամարդիկ կարող են գրկելով տեղափոխել իրենց կանանց, ապա մենք դա դիտում ենք որպես բռնություն և ոտնձգություն»:

Դեպքը տեղի է ունեցել Աբովյան փողոցի կտորեղենի խանութում, որտեղից ԴԱՀԿ ծառայակիցները, ըստ դատավճռի, պետք է վտարեին Զինաիդա Մելիքյանին և Կարինե Թումանյանին: Դեպքի վայր ժամանած իրավապաշտպանը վերջիններիս խնդրել է առանց դիմադրության դուրս գալ տարածքից, քանի որ նրանց մասով եղել է օրինական կատարողական թերթիկ:

«Ինչ վերաբերում է Զինա Գյոզալյանին, ապա ԴԱՀԿ ծառայողները որևէ իրավունք չունեին նրան վտարելու այդ տարածքից, քանի որ նրա անունը կատարողական թերթիկում չկար: Ես և փաստաբանը դա էինք փորձում բացատրել նրանց, սակայն արժանացանք բռնության»,- հիշում է Մարինա Պողոսյանը:

Տարեց կնոջ առողջական վիճակը վատացել է տեղում, երկու անգամ շտապօգնություն են կանչել: Երկրորդ կանչով ժամանած բժիշկ Գոհար Տրդատյանը հետագայում իր տված բացատրության մեջ նշել է, որ Զինա Գյոզալյանի մարմնի վրա նկատել է բռնության հետքեր. «…Տատիկն ասաց, որ իրեն ստիպում են դուրս գալ իր բնակելի տարածքից՝ քաշելով ձեռքերից, և ցույց տվեց նաև բազուկների շրջանում առաջացած հեմատոմաներ՝ կապտուկներ, ասելով, որ իրեն քաշքշելու արդյունքում են այդ կապտուկներն առաջացել»:

Զինա Գյոզալյանը և Մարինա Պողոսյանն իրենց ցուցմունքներում նշել են, որ հարկադիր կատարողները բառի բուն իմաստով իրենց դուրս են շպրտել խանութի տարածքից, մինչդեռ վերջիններս բոլորովին այլ կերպ են մեկնաբանում իրենց արարքը. «Զինա Գյոզալյանը դիմադրում էր մեզ՝ քաշքշելով, իր ֆիզիկական ուժով փորձում էր թույլ չտալ, որ տարածքից դուրս բերենք իրենց իրերը»,- գրել է հարկադիր կատարողներից մեկը՝ Արամ Իսրայելյանը:

«Դուք կարո՞ղ եք պատկերացնել, որ 75-ամյա կինը, ում համար երկու անգամ շտապօգնություն է ժամանել, քաշքշի այդ հաղթանդամ տղամարդկանց: Այդ ինչ ուժ պետք է նա ունենար, որ կարողանար խոչընդոտել նրանց»,- ասում է Մարինա Պողոսյանը:

Բռնությունը, սակայն, չի սահմանափակվել կանանց «գրկելով տարածքից հեռացնելով»: Երբ իրավապաշտպանը դեպքի վայրից փորձել է հերթական անգամ ոստիկանություն զանգել, նրան պարզապես զրկել են ազատությունից՝ փակելով առանձին սենյակում: Այս դրվագի վերաբերյալ վկաների ցուցմունքները թերևս ամենազավեշտալին են: ԴԱՀԿ ծառայակիցները պնդում են, որ իրենք են փորձել մեկուսացնել Մարինա Պողոսյանին, իսկ ոստիկանների ցուցմունքներում նշված է, որ Մարինան ինքնակամ է մտել սենյակ և հայտարարել է, որ այնտեղից դուրս չի գալու:

«Մարինան մտավ ներսի սենյակ և ասաց, որ դուրս չի գալիս: ԴԱՀԿ ծառայության աշխատակիցը հարցրեց՝ «որ դռները փակենք, գնանք՝ մնալո՞ւ եք ներսում», Մարինան ասաց, որ մնալու է, դուրս չի գալու»,- սա ոստիկան Գ. Գրիգորյանի բացատրությունն է: Վերջինս, սակայն, հարցաքննության ժամանակ «սայթաքել է»՝ խոստովանելով, որ լսել է, թե Մարինա Պողոսյանն ինչպես է ներսի սենյակից բղավում. «Դուք հանցագործություն եք անում, ինձ ազատությունից զրկում եք»:

«Եթե ես ինքնակամ էի մտել այդ սենյակ, ապա ինչո՞ւ պետք է բղավեի, որ ինձ ազատությունից զրկել են. պարզ է, որ ոստիկանները կեղծ ցուցմունքներ են տվել, սակայն պատասխանատվության չեն կանչվել դրա համար»,- ասում է Մարինա Պողոսյանը:

Այնինչ՝ հարկադիր կատարող Գագիկ Հովհաննիսյանը խոստովանել է, որ հենց ինքն է մեկուսացրել Մարինա Պողոսյանին. «Ես փորձել եմ Մարինա Պողոսյանին մեկուսացնել, որպեսզի առանց խնդրի կարողանանք խանութից դուրս բերել Զինա տատիկին, դուռը մի պահ ձեռքով պահել եմ ուղղակի նրան մեկուսացնելու համար»:

Սա քրեական գործում առկա տասնյակ հակասություններից ընդամենը մեկն է, սակայն Հատուկ քննչական ծառայության ավագ քննիչ Սամվել Սարգսյանը չի արել որևէ առերես հարցաքննություն՝ այդ հակասությունները պարզաբանելու համար, այլ կարճել է գործի վարույթը: Ավելի ուշ գործը վերահսկող դատախազը կարճել է քննիչի որոշումը՝ գտնելով, որ ԴԱՀԿ չորս ծառայակիցների արարքում առկա է ՀՀ քրեական օրենսգրքի 309-րդ հոդվածի 2-րդ մասով (պաշտոնեական լիազորությունները չարաշահելը, որը զուգորդվել է բռնություն գործադրելով) նախատեսված հանցակազմ:

Քրեական գործի վարույթը վերսկսվել է, սակայն քննիչ Սամվել Սարգսյանն էլ այս անգամ բավարարվել է ընդամենը հավելյալ երկու բացատրություն վերցնելով և փակել է գործը:

Տուժող Մարինա Պողոսյանը բողոքարկել է քրեական գործը կարճելու մասին որոշումը Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում:

Դատական նիստը նշանակված է փետրվարի 11-ին՝ ժամը 10:00-ին. «Եթե դատարանն էլ գտնի, որ ԴԱՀԿ ծառայակիցներն անմեղ են, ապա մնում է միայն ինքնադատաստանի միջոցով պատժել նրանց, քանի որ ես չեմ պատրաստվում հանդուրժել, որ իմ հանդեպ բռնություն կիրառած մարդիկ անպատիժ մնան»,- վստահեցնում է «Վելես» հասարակական կազմակերպության նախագահ Մարինա Պողոսյանը:

Հեղինակ՝ Արման Ղարիբյան

Սկզբնաղբյուրը`http://www.1in.am/1541123.html